@ ไทน้ำเซิ้ญมาเอิ้นกลับบ้านจ้า @

@ ไทน้ำเซิ้ญมาเอิ้นกลับบ้านจ้า @

สาวขอนแจ่น..แดนอิสานคนบ้านนอก
สิมาบอกหมู่เฮาชาวอิสาน
หากผู๋ใด๋จากเฮือนบ่เยือนนาน
ให้กลับบ้านเดือนหน้าอย่าสิลืม

เทศกาลประจำปีมีงานไหม
งามผ้าไทยพี่น้องเห็นต้องปลื้ม
ผู้บ่าวสาวเที่ยวงานตระการยืม
ที่พรอดรักดูดดื่มบ่ลืมเรือน

กลับคืนบ้านเฮาเด้อ..ผู้บ่าวสาว
ไปจักคราวค่อยกลับอย่าลับเลื่อน
ไปเบิ่งควายบักตู้ใต้ล่างเฮือน
ไปเหลียวเบิ่งดาวเดือนอยู่ท่งนา

ไปเก็บเห็ดกระด้างอยู่กลางขอน
ออกไปนอนห่มบักขามเบิ่งน้ำท่า
ไปหาเอียนหาปูแลหาปลา
ต้มไก่ป่านาหนองย่างหม่องดิน

คันฮอดแล้วสลักไว้ไม้แป้นปีก
เขียนบ่จีกคือตองอย่ามองหมิ่น
มาฮอดแล้วบ้านเฮาผู้เฒ่ายิน
บ่ได้เห่าเครื่องบินอยู่ถิ่นทาม

กลับบ้านเฮาเด้อหล่า..เอื้อยพาอ่าว
พากันฟ้าวเก็บเงินอย่าเพลินห้าม
กินข้าวแลงกับพ่อแม่แลจักยาม
บ่าวสาวงาม..มาอ้อน คนขอนแจ้น../ไป่โลดๆ

..ไทน้ำเซิ้ญมาเอิ้นกลับบ้าน...
@เครือหวายเกี้ยว พิณจันทร์@

	ผู้เขียน	หัวข้อ: @ ไทน้ำเซิ้ญมาเอิ้นกลับบ้านจ้า @ (อ่าน 12472 ครั้ง)
0 สมาชิก และ 1 บุคคลทั่วไป กำลังดูหัวข้อนี้