@กินข้าวนำกันเด้อ~เครือหวายเกี้ยว@

@กินข้าวนำกันเด้อ~เครือหวายเกี้ยว พิณจันทร์@

กินข้าวแลงนำกันกับฉันบ่
แกงปลาคอเด้อจ้าฟ้าวมาแหว่
มืดค่ำแล้วแจ่วฮ้อนบ่ห่อนแล
เดิ่กมาปวดท้องแท้ให้แน่นอน

อย่าซู้กินของดิบหยิบใส่ปาก
มันลำบากเบื่อหน่ายยามถ่ายถอน
พ่อแแม่เฮาเพิ่นให้กินของฮ้อน
อย่าออนซอนลาบก้อยมาซอยกิน

กินข้าวแลงกันแล้วฟ้าวแซวหลับ
อย่าซู้นับดาวด่นให้คนหมิ่น
เป็นผู้สาวให้นอนเอาตีนซิ่น
ผู้บ่าวยินหัวขวนเพิ่นมวนแซว

อย่าซู้เอิ้นกันเที่ยวยามมื้อคืน
ให่ฟ้าวตื่นเฮ็ดนาก่อนนกแก้ว
ให่หลกกล้าหว่านข้าวผู้เฒ่าแนว
อย่าแตกแถวนำซู้บ่อยู่นา

เหลียวเบิ่งหนองคลองทามมีน้ำหลาก
เป่งน้ำมากเข้าไปได้น้ำท่า
ฟ้าวเอาลอบมาใส่ได่ดักปลา
มื้อแลงมาแกงส้มต้มปลาคอ

มากินข้าวนำกันเด้อพี่น้อง
กินอิ่มท้องฮ้องผญาพากันจ้อ
คนอิสานบ้านเฮา วอนเว้ารอ
อย่าซู้ส่อเสียดกัน..ฉันคนไทย

โอ้ยม่วนเด้..เขียนไปแปลไปนำก้น..ฮ่าๆ

@ เครือหวายเกิ้ยว พิณจันทร์ @
๑๗ ตุลาคม ๒๕๕๖

(ปลาคอ-ปลาช่อน)(มาแหว่-มาหา)(เดิ่ก-ดึก)(แซว-รีบ)(อย่าซู้-อย่ามัวช้า)(ตีนซิ่น-ชายผ้าถุง)
(หัวขวน-หัวเราะ)(ผู้เฒ่าแนว-โบราน)(นำซู้-ตามชู้ ไปเที่ยว)(เป่งน้ำ-เปิดทางน้ำ)

	ผู้เขียน	หัวข้อ: @กินข้าวนำกันเด้อ~เครือหวายเกี้ยว@ (อ่าน 12903 ครั้ง)
0 สมาชิก และ 1 บุคคลทั่วไป กำลังดูหัวข้อนี้